Luk 7 | MHL | STEP | Aria Yeesus opora wia maakep-puap Kapeneam ikiwok.

Luke 7

Yeesus Rom mauwow mua oko saliwak

(Matiu 8.5-13)

1 Aria Yeesus opora wia maakep-puap Kapeneam ikiwok. 2 Wi Rom ami woos mua oko-ko nan ikua. Mua nain wi ami mua andet kuisow wia urufiya. O uuwow mua wiar napumarep umekam naep wame ookam-ikua, uuwow mua eena senam akena kookaliya nain. 3 Aria Yeesus nan ikua nain meta miimap wi Yuuda woos mua wia sesekak, ni ikiwep maakiwkin ekapep uuwow mua fain saliwinok naek. 4 Ne wi ikiwep Yeesus wiar kererep maakemik, “Woos mua nain eliwa-ke, no-ko asipe. 5 I Yuuda yia kookaliya, ne lotu koora yia kuomak.” 6 Yeesus maakiwkin wiamiya ikiwok. Koora mamaiya arem-ikaeya woos mua nain-ke ona womar wia sesekeya ekap maakemik, “O feenap maek, ‘Maneka, no neekeriw ike. No koora efar ikiwowa nain yo mua eliwa wia. 7 Ne yos pun mua oram-ke, naapeya yo me nefar ikiwem. No neekeriw ikok oram oporiw maeya uuwow mua fain kiiriw efar sariarinok. 8 Sira-ke feenap ikua. Yo yena woos mua tepak-pa wiar ikem, ne ami mua teeria yo tepak-pa efar ikemik. Yo mua oko ikiwowa suuwamkun eliw ikiwep-puinon. Ne mua oko ekapowa suuwamkun ekapep-puinon. Ne yena uuwow mua uuwowa maakinen-na, eliw mauwinon,’ o naap maakeka.” 9 Ne Yeesus opora naap miimap kakaemi kirep wi teeria maneka ookam-ikemik nain wia maakek, “Yo nia maakiyem, mua nain yo kekanowa maken akena-ke efar naiya, ni Isrel mua kuisow feenap-ko me nia imenam, weetak akena,” naap maek. 10 Ne woos mua, mua wia sesekak nain kiiriw kirep koora ikiwemik. Ikiwemik-na uuwow mua nain sariarep ikaeya urufamik.

Yeesus takira oko umeya iikirowak

11 Ne iir oko-pa Yeesus owow oko Nain naimik nain ikiwok. Ona teeria ne emeria mua unowa o wameiya ikiwemik. 12 Owowa nain omopora mamaiya arem-ikok wi owow mua sawi napuma oko amaporom-ikaiwkin wia urufamik. Muuka nain ona onak pun wameiya orom-ikua. Onak nain iiriw apurarep ikua ne muuka kuisow muuta naap. Emeria mua unowa apura nain wameiya oromi muuka nain soopowa ekapem-ikemik. 13 Ne Yeesus-ke apura nain urufap kemalep maakek, “Me omome.” 14 Naap maep ekap sawi napuma nain ika wiar opeya wi iimaremik. Ne takira nain maakek, “No iikire, yos-ke nefa maakiyem.” 15 Naeya iikirap pokap aakunek. Iikireya ona onak “Aawe” naakek. 16 Ne emeria mua unowa naap urufap opaimika tenemik. Ne wi keker opap Mua Maneka unuma fakerami maemik, “Profet oko fan yiar kererek. Mua Maneka ona teeria yia aawowa naep kererek.” 17 Naeya ikiwemi Yuuda owow unowa nain ne kame papako pun wia maakemi Yeesus meta manekamik.

Yon mua erup wia sesekeya Yeesus wiar ekapemik

(Matiu 11.2-19)

18 Aria Yon Baptais koora ekap ikaeya ona teeria-ke ikiwep Yeesus maa unowa onomakek nain maakemik. 19 Maakiwkin miimap ona teeria mua erup wia sesekak, Yeesus wiar ikiwep feenap nokareka, “Mua Maneka mua sesekowa maek nain makena nos-i e mua oko nan ikua, i nain arewiyen?” 20 Wiam erup ikiwep Yeesus wiar kererep maemik, “Yon Baptais-ke feenap nokareka naep yia sesekak, ‘Mua Maneka mua sesekowa maek nain makena nos-i e mua oko nan ikua, i nain arewiyen?’” 21 Ne iir nain Yeesus emeria mua unowa napum sira-sira wiar ikua nain wia saliwam-ikua. Sawur unowa mia-pa wiar ikua nain pun wiar iirarem-ikua. Mua mokok opa pun wia saliweya maa urufam-ikemik. 22 Ne Yeesus-ke wiam erup nain wia maakek, “Ni aakisa maa urufiman nain ne miimiman nain kirep ikiwep Yon maakeka. Feenap, wi mua mokok opa nainiw maa urufimik, wi paara opap ikemik nain kiiriw soomarimik, wi mua mia gigir mane-maneka ikemik nain pun sariarimik, aria wi ifan kuowa kiiriw opora miimimik ne wi umiwkin wia iikirowiyem. Ne wi mua oram nain opor eliwa wia maakemkun miimimik. 23 Aria wi mua, yo kema me efa mika-kofimik nain wi kema eliw ikaikuan.”

24 Aria mua wiam erup nain ikiwiwkin, Yeesus Yon maemi yakeyak maneka feenap wia maakek, “Ni iiriw epa asia nomon manekiw nan ikiweman nain, maa mauwa urufowa ikiweman? Ni sukuwka ifa ewar-ke wuunoweya kiri-kiriya nain urufowa ikiweman-i? Weetak. 25 Nain ni maa mauwa urufowa ikiweman? Mua oko mia suuwowa eliwa wuiya nain urufowa ikiweman-i? Nain pun weetak, wi mua mia suuwowa eliwa wuimik nain, ne maa enowa ele-eliwa enimimik nain, wi owow saria maneka koora-pa wiar ikaimik. 26 Nain ni maa mauwa urufowa ikiweman? Profet oko-ko urufowa ikiweman-i? Ae, pepek. Yo makena nia maakiyem, o profet-ke, nain wi profet unowa wia nomakek. 27 Mua Maneka opora siisimep-puamik nain mua makena naneka. Mua Maneka-ke o naep Muuka maakek,

‘No miime, ikoka sesel mua oko sesekinen. Ne os-ke miimep ikiwemi no era eepominon.’
(Malakai 3.1)

28 Yo feenap nia maakinen, mua unowa miiwa-pa imenaremik nain Yon-ke wia nomakek. Nain wi Mua Maneka pika kemena-pa wiar ikemik nain wi mua oram akena nain-ke o nomakikuan.” Naap wia maakek.

29 Iiriw wi emeria mua unowa ne wi takis aawow mua unowiya Yon opora wiar miimap Mua Maneka sira makena-ke naemik. Naemi o wiar oraiwkin wia yasuwam-ikua.

30 Wi Farisi ne wi sira amis mua me wia yasuwak. Moram era eliwa Mua Maneka wia wuomak nain mikikira wiar iwemik.

31 Ne nainiw wia maakek, “Ni aakis teeria fain maa mauwa maemi sira niar pepekiminen? Ni kamenap nain-ke? 32 Ni teeria faa, wi takir galagala saarik. Feenap, owow uruma-pa pokap ikok takir papako wia faremi maimik, ‘I pia nia fuuromamkun ufowa miatiniman. Ne salel awemkun ni me omomiman,’ naap maimik. 33 Nis pun naap ikeman. Yon Baptais fan ikua nain maa enowa ne eka kekanowa enowa emi wuam-ikua. Ne nis-ke maeman, ‘Sawur-ke mia-pa wiar ikua aa,’ naap maeman. 34 Ne aakisa yo Mua Muuka-ke ekapep maa enowa ne eka enowa emi me yame wuamkun efa maiman, ‘Nee, mua faa, maa enow masia, ne eka erua. Ne wi takis aawow mua ne wi pina mua womar-ke.’ Naap efa maiman. 35 Nain wi eena Mua Maneka amisa wiar aawimik, wi nain-ke ariman wiar wuami wia ofakowikuan, amisa nain maken akena-ke.”

Emeria oko-ke sanda aawep Yeesus merena ifomak

36 Ne aria Farisi oko-ke Yeesus maakek, “Ekapep yo koora-pa maa enime,” naakek. Naeya o ookap ikiwok. 37 Pina emeria-ko owowa nan ikua, ne o Yeesus koora nan ikua nain miimap sanda eliw akena nain aawep feekiya ikiwok. 38 Ikiwep Yeesus kame kiir inep ikok maa enem-ikaeya wiar ekap meren onoma-pa keema wueskap omem-ikua. Ne omow eka-ke oromi Yeesus merena wiar yasuwam-ikua. Ne ona afif fuula nainiw omow eka ipiwak. Merena wiar dubilami sanda eliwa nain merena-pa sawikomak. 39 Ne Farisi nain-ke naap urufap ona kema-pa maek, “Mua fain profet ikekak-na emeria fain merena wiar opak nain amisarekak, ne sira pun wiar amisarekak. Emeria fain-na pina emeria-ke.” 40 Naeya Yeesus mua nain kema wiar amisarep kiremi maakek, “Saimon, yo-ko efa miime.” Ne maek, “Somek mua, no mae.” 41 Ne arekin opora feenap iromak, “Mua wiam erup-ko, mua oko maamuma wiar muuna wuamik. Mua oko-ke andet ikur muuna wiar wuak ne oko-ke kuuma ikur. 42 Wiam erup muuna nain kiripowa me pepek, naeya muuna nain wiar iirarek. Ne wiam erup nain mua kain-ke o manek akena kookalinon?” Naap maek. 43 Ne Saimon-ke maakek, “Aisokion, mua muuna maneka wiar wuak nain-ke-yon.” Naeya maakek, “No pepek maen.” 44 Neemi kirep emeria nain mokakemi Saimon maakek, “Urufe. Yo koora nefar ekapem nain merena me yasuwomen. ^{▼▼7.44Wi Yuuda mua muupera wiar ekapimik nain sira eliwa wia onimik. Koor onoma uuwow mua wia sesekiwkin kepura wia yasuwomimik.} Nain emeria fain-ke ona omow eka-pa merena yasuwomep ona afif fuuliw ipiwak. 45 Yo me efa ane-puukami me efa opa-wuaken, nain emeria fain-ke sira eliwa efa onam-ikua. 46 No wel aawep yo afifa-pa me ifomeya emeria fain-ke sanda aawep merena sawikomek. 47 Naapeya maiyem, yo efa kookalep sira eliwa efa onak nain wiar urufap eliw amisarinan, o pina onomakek nain iiwawun wiar iirarem. Nain mua eena yo pina gelemuta onam wame maiya nain, Mua Maneka-ke pina wiar iirarinon-na mua nain Mua Maneka manek akena me kookalinon.” 48 Ne kiremi emeria nain maakek, “No pina nefar iirarem.” 49 Naeya wi mua nan ikemik nain wi-wieniw maem-ikemik, “Nee, mua fain kamenapeya wi pina wiar iirariya noma?” 50 Ne Yeesus-ke emeria nain maakek, “No opora efar opeya Mua Maneka-ke nefa aawok. No ikiwep kema eliw manekiw ike.”